महाराष्ट्राच्या राजकारणात आज एका अशा भेटीने सर्वांच्या नजरा वळवल्या आहेत, ज्याची कोणी कल्पनाही केली नव्हती. राष्ट्रवादी काँग्रेसचे पार्थ पवार आज दुपारी अचानक मनसे अध्यक्ष राज ठाकरे यांच्या ‘शिवतीर्थ’ या निवासस्थानी पोहोचले. अजित पवार यांच्या निधनानंतर बदललेल्या राजकीय समीकरणांच्या पार्श्वभूमीवर ही भेट अत्यंत महत्त्वाची मानली जात आहे. विशेष म्हणजे, काही दिवसांपूर्वीच रोहित पवार यांनीही राज ठाकरेंची भेट घेतली होती, त्यामुळे पवार घराण्यातील युवा नेत्यांचा शिवतीर्थावरील वावर राजकीय वर्तुळात चर्चेचा केंद्रबिंदू ठरला आहे.
अजित पवार यांच्या दुर्दैवी विमान अपघाताच्या चौकशीच्या अनुषंगाने यापूर्वीच्या भेटी झाल्या होत्या, मात्र आज पार्थ पवार यांनी घेतलेली भेट ही केवळ चौकशी संदर्भात आहे की त्यामागे काही वेगळे राजकीय गणित दडले आहे, याबाबत कमालीची गुप्तता पाळली जात आहे. राज ठाकरे यांच्याशी चर्चा केल्यानंतर पार्थ पवार यांनी माध्यमांशी संवाद साधण्याचे टाळले आणि ते थेट आपल्या गाडीत बसून निघून गेले. त्यांच्या या मौनामुळे या भेटीचे गूढ अधिकच वाढले असून राजकीय तर्कवितर्कांना ऊत आला आहे.
दुसरीकडे, पार्थ पवार सध्या राज्यसभेत खासदार आहेत. सुनेत्रा पवार यांनी राज्यसभेचा राजीनामा देऊन राज्याच्या दुसऱ्या उपमुख्यमंत्रीपदाची शपथ घेतल्यामुळे रिक्त झालेल्या जागेवर आता पार्थ पवार यांची वर्णी लागली आहे. सुनेत्रा पवार यांच्याकडे सध्या राष्ट्रवादी काँग्रेस पक्षाची सर्व सूत्रे असून, त्या पक्षाच्या अध्यक्षपदी आणि विधिमंडळात प्रमुख म्हणून कार्यरत आहेत. अशा परिस्थितीत पार्थ पवारांची ही ‘राज’ भेट भविष्यातील नवीन युतीचे संकेत तर नाहीत ना, असा प्रश्न विचारला जात आहे.
या भेटीचे पडसाद आगामी काळात राज्याच्या राजकारणात कसे उमटतात हे पाहणे औत्सुक्याचे ठरेल. सत्तेच्या पटलावरील हा नवीन डाव नेमकी कोणती दिशा घेतो, याकडे आता सर्व राजकीय विश्लेषकांचे लक्ष लागले आहे.
