निसर्ग सौंदर्याने नटलेल्या त्र्यंबकेश्वर तालुक्यातील ‘चाकोरे’ हे छोटेसे गाव आता जगभरात आपली एक वेगळी आणि ‘गोड’ ओळख निर्माण करण्यासाठी सज्ज झाले आहे. महाराष्ट्र राज्य खादी व ग्रामोद्योग मंडळाने या गावाची निवड ‘मधाचे गाव’ म्हणून केली असून, लवकरच या परिसरात मधाच्या धारा वाहताना दिसणार आहेत. डोंगरांच्या कुशीत वसलेल्या या गावाला केवळ नैसर्गिक सौंदर्यच नाही, तर आता हक्काचा रोजगार आणि पर्यटनाचा नवा मार्गही सापडला आहे.
ग्रामीण अर्थव्यवस्थेला नवी झळाळी देण्यासाठी राज्य सरकारने एक महत्त्वाकांक्षी पाऊल उचलले आहे. राज्यातील पहिल्या टप्प्यात निवडल्या गेलेल्या १० गावांमध्ये नाशिकच्या चाकोरे गावाचा समावेश झाला आहे. या विशेष उपक्रमासाठी शासनाने ५.१० कोटी रुपयांचा भव्य निधी मंजूर केला असून, त्यातील सुमारे ५० ते ५५ लाख रुपये एकट्या चाकोरे गावाच्या विकासासाठी आणि मधोत्पादनासाठी खर्च केले जाणार आहेत. या निधीतून केवळ मध संकलनच नाही, तर आधुनिक तंत्रज्ञान आणि प्रशिक्षणाद्वारे मधाची गुणवत्ता जागतिक दर्जाची करण्याचे उद्दिष्ट ठेवण्यात आले आहे.
या योजनेची अंमलबजावणी केवळ कागदावर नसून प्रत्यक्ष जमिनीवरही सुरू झाली आहे. चाकोरे आणि बेळे गट ग्रामपंचायतीमधील ४० होतकरू मधपाळांची निवड करण्यात आली असून, त्यातील २५ जणांना आधुनिक मधमाशीपालनाचे विशेष प्रशिक्षणही देण्यात आले आहे. नुकत्याच झालेल्या एका सोहळ्यात खादी व ग्रामोद्योग मंडळाचे सभापती रवींद्र साठे यांच्या हस्ते १२५ मधपेट्यांचे वाटप करण्यात आले. यामुळे स्थानिकांना जंगलातील पारंपरिक मध शोधण्याऐवजी आता वैज्ञानिक पद्धतीने उत्पादन घेता येईल. या प्रकल्पामुळे केवळ मधाचे उत्पादनच वाढणार नाही, तर नाशिकमध्ये ‘मध पर्यटनाला’ मोठी चालना मिळेल, असा विश्वास प्रशासनाने व्यक्त केला आहे.
